રાજ્યના ૩૩ જિલ્લા અને ૮ મહાનગરોમાં કોંગ્રેસ પક્ષ દ્વારા યોજાયેલ ધરણાં-દેખાવો કાર્યક્રમ

ભાજપ સરકાર-મોદી સરકારની બિનલોકતાંત્રિક પધ્ધતિ અહંકારી વલણ અને લોકશાહીને ગળેટૂંપો દેવાની કામગીરી સામે રાજ્યના ૩૩ જિલ્લા અને ૮ મહાનગરોમાં કોંગ્રેસ પક્ષ દ્વારા યોજાયેલ ધરણાં-દેખાવો કાર્યક્રમ અંગે ગુજરાત પ્રદેશ કોંગ્રેસ સમિતિના પ્રવક્તા ડૉ. મનિષ દોશીએ જણાવ્યું હતું કે, દેશની ટોચની શૈક્ષણિક સંસ્થાઓની સ્વાયત્તતા છીનવી લીધા પછી, ભાજપના સત્તાધીશોએ હવે દેશના રાજ્યોમાં લોકશાહી ઢબે ચૂંટાયેલી કોંગ્રેસની સરકારોને શામ, દામ, દંડ, ભેદ દ્વારા સત્તાસ્થાનેથી ઉથલાવવાનું બીડું ઝડબ્યું હોય તેમ જણાય છે. લોકશાહી ઢબે ચૂંટાયેલી બંધારણીય રીતે સત્તાસ્થાને બેઠેલી કોંગ્રેસની સરકારોને ઉથલાવીને ભાજપના સત્તાધીશો હિટલરશાહીને પુનર્જીવિત કરી રહ્યાં છે. ભાજપના આવા સરમુખત્યારશાહી અને બિનલોકતાંત્રિક પગલાં સામે સમગ્ર રાજ્યમાં કોંગ્રેસ પક્ષ દ્વારા રાજ્યવ્યાપી ધરણાં-દેખાવોનો કાર્યક્રમ યોજાયો હતો જેમાં મોટી સંખ્યામાં કાર્યકરો – આગેવાનો જોડાયા હતા અને ભાજપની લોકશાહી વિરોધી નિતી સામે ઉગ્ર સૂત્રોચ્ચાર કર્યાં હતા. સમગ્ર દેશની પ્રજા પણ હવે તો ભાજપના વર્તમાન સત્તાધીશોને સારી રીતે ઓળખી ગઈ છે અને ભાજપના આવા આપખુદ અને બિનલોકશાહી ચારિત્ર્યને સાંખી લેવા તૈયાર નથી.