તા.૮-૮-૨૦૧૭ ના રોજ રાજ્યસભાની ત્રણ બેઠકો માટે યોજાયેલ ચૂંટણીની મતગણતરીમાં કોંગ્રેસ પક્ષના વરિષ્ઠ નેતાશ્રી અહેમદભાઈ પટેલનો ભવ્ય વિજય થતા કાર્યકરો અને આગેવાનોમાં આનંદની લાગણી ફેલાઈ હતી.  ભાજપના તમામ કારનામા અને કાવત્રા નિષ્ફળ રહ્યાં ભાજપના મનસૂબા પર પાણી ફરી વળ્યું. રાજ્યસભાની ચૂંટણીના પરિણામ બાદ ડરી ગયેલ અને હેબતાઈ ગયેલ ભાજપ અનાપ-સનાબ આક્ષેપો કરીને ચહેરો છુપાવવાના પ્રયત્ન કરી રહી છે. રાજ્યસભાની ચૂંટણીમાં જે દિવસથી પ્રથમ જાહેરનામુ ત્યારબાદ જાહેરનામું બે મહિના માટે સ્થગિત કરાવવું અને ચૂંટણીના નવા જાહેરનામા બાદ કોંગ્રેસ પક્ષમાંથી ધારાસભ્યોને લોભ, લાલચ, ધાક-ધમકી, કેન્દ્રીય એજન્સી દ્વારા હેરાનગતિ છતાં ભાજપના જીત માટેની ડંફાશોનો પરપોટો ફુટી ગયો છે. મતદાન અને મતગણતરી દરમ્યાન પણ ભાજપ દ્વારા ખોટી ખોટી વિગતો જાહેર કરવામાં આવી રહી હતી. સતત ભ્રમણા અને વિસંગતતાની સાથે અસમંજસની સ્થિતિ પેદા કરવાનો નિષ્ફળ પ્રયાસ કરવામાં આવ્યો હતો. જેમાં ત્રણ કલાક બાદ ભાજપના ખોટા દાવાઓનો પર્દાફાશ થયો હતો.

કોંગ્રેસ ઉપાધ્યક્ષ શ્રી રાહુલ ગાંધીએ આજે પૂરગ્રસ્ત બનાસકાંઠા જિલ્લાની મુલાકાત લીધી હતી. શ્રી રાહુલ ગાંધી રાજસ્થાનથી સીધા હેલિકોપ્ટર મારફતે બનાસકાંઠા આવી પહોંચ્યા હતા. આ મુલાકાત સમયે પ્રદેશ પ્રભારી અશોક ગેહલોત અને પ્રદેશ પ્રમુખ ભરતસિંહ સોલંકી, અર્જુન મોઢવાડિયા, શ્રી સિધ્ધાર્થભાઈ પટેલ સહિતના આગેવાનો તેમની સાથે રહ્યા હતા. પૂરપીડિતો સાથે મુલાકાત બાદ ધાનેરા માર્કેટયાર્ડમાં શ્રી રાહુલ ગાંધીએ વેપારીઓ સાથે મુલાકાત કરી હતી જેમાં શ્રી રાહુલ ગાંધી સમક્ષ વેપારીઓએ પોતાની વ્યથા ઠાલવી હતી. ધાનેરાના માલોત્રા ગામમાં પૂરના પાણી ઘૂસી ગયા હતા. પૂરના પાણીમાં તણાઈ જતાં રાવતાભાઈ પ્રજાપતિનું મોત થયું હતું. તેમના પરિવારને મળવા માટે શ્રી રાહુલ ગાંધી માલોત્રા ગામે પહોંચ્યા હતા જ્યાં પરિવારના સભ્યો સાથે ચર્ચા કરી હતી અને આશ્વાસન આપ્યું હતું. જ્યારે બારોટ પરિવાર સાથે બેસીને શ્રી રાહુલ ગાંધીએ તેમની વ્યથા સાંભળી અને બાળકને વહાલ કર્યું. ધાનેરા બાદ થરાના રૂણી ગામ ખાતે શ્રી રાહુલ ગાંધીએ પુરપીડીતો સાથે વાતચીત કરી હતી અતિવૃષ્ટિમાં હજારો લોકો બેઘર થયા છે, ખેડૂતોની હજારો હેક્ટર જમીનનું સંપૂર્ણપણે ધોવાણ થયું છે. પાક સંપૂર્ણ નાશ પામ્યો છે. રૂણી ગામ ખાતે જતા રસ્તામાં શ્રી રાહુલ ગાંધીએ પોતાના કાફલાને રોકીને મોટી સંખ્યામાં ઉપસ્થિત પુરપીડીતો સાથે રાહુલજીને આપવીતી સાંભળી હતી. તેમની વ્યથા અને દુઃખ દર્દ સાંભળ્યા બાદ શ્રી રાહુલ ગાંધીએ જૈન ઉપાશ્રય ખાતેની બેઠકમાં પણ થરા વિસ્તારના પુરગ્રસ્ત ભાઈ-બહેનોને સંબોધન કરતા લાગણીસભર અવાજે કહ્યું હતું કે, લોકસભા અને રાજ્યસભામાં કોંગ્રેસ પક્ષ પુરપીડીતોનો અવાજ ઉઠાવશે અને રાજ્ય સરકાર અને કેન્દ્ર સરકાર પર પુરપીડીતોને પુરતો ન્યાય મળે તે માટે દબાણ લાવશે. જૈન ઉપાશ્રય ખાતે ખારીયા ગામમાં કરૂણ ઘટનામાં ભોગ બનનાર એક જ પરિવારના ૧૭ સભ્યોના મૃત્યુ થયા હતો આ પરિવારના સ્વજનો સાથે શ્રી રાહુલ ગાંધી વ્યક્તિગત મળીને તેમના દુઃખમાં ભાગીદાર થયા અને સાંત્વના પાઠવી હતી. રૂણી ગામ ખાતે નર્મદા કેનાલનું જે મોટા પાયે તૂટવાની ઘટના બની તેના કારણે અનેક પરિવારો અસરગ્રસ્ત થયા, ભોગ બન્યા, મોટા પાયે નુક્શાન થયું તે સ્થળની મુલાકાત રાહુલજીએ લીધી હતી.

ગુજરાત સરકાર દ્વારા જમીન માપણીના કારણે ગુજરાતના ૧ કરોડથી વધુ ખેડૂતોના અનેક સર્વે નંબરમાં મોટા પાયે ગોટાળો થયો છે. ભાજપ સરકારની મળતીયા એજન્સી દ્વારા જમીન માપણીમાં મોટા પાયે થયેલા ગોટાળા અને વગદાર માણસો દ્વારા થયેલા ભ્રષ્ટાચાર સામે, ગુજરાતના ખેડૂતોની સમસ્યાને વાચા – ન્યાય અપાવવા ઉપરાંત ખેડૂતોના દેવામાફીની માંગ સાથે કોંગ્રેસ પક્ષ દ્વારા રાજ્યના ૩૩ જિલ્લા અને ૮ મહાનગરોમાં શહેર/જીલ્લા કક્ષાએ કલેક્ટરશ્રીને રેલી સ્વરૂપે જઈને આવેદનપત્રનો કાર્યક્રમ યોજાયો હતો. જેમાં મોટી સંખ્યામાં કોંગ્રેસ પક્ષના કાર્યકરો આગેવાનો અને ખેડૂત સમાજના પ્રતિનિધીઓ જોડાયા હતા.